Biz elə etməliyik ki, dünyada mövcud olan
standartlara maksimum dərəcədə yaxın olaq.

İlham Əliyev
Azərbaycan Respublikasının Prezidenti

Xəbərlər
  • 21 Sentyabr 2016
    Standartlaşdırma, Metrologiya və Patent üzrə Dövlət Komitəsində Almaniyanın ölkəmizdəki səfiri Mixael Kindsqrabla görüş olub

    21 sentyabr 2016-cı il tarixində Standartlaşdırma, Metrologiya və Patent üzrə Dövlət Komitəsinin sədri Ramiz Həsənovun Almaniya Federativ Respublikasının Azərbaycandakı səfiri Mixael Kindsqrabla görüşü olub. Komitə sədri  Azərbaycanla Almaniya arasında ikitərəfli münasibətlərin inkişaf səviyyəsindən məmnunluğunu ifadə edib. Ramiz Həsənov bildirib ki, ölkələr arasında hər sahədə uğurlu əməkdaşlıq əlaqələri olduğu kimi, keyfiyyət infrastrukturu sahələrinin inkişafında da Avropa, xüsusilə Almaniya təcrübəsindən istifadə olunur.

    Komitə sədri xatırladıb ki, Azərbaycan hələ 2008-ci ildən keyfiyyət infrastrukturu üzrə yeni yanaşmanın tətbiqinə start vermişdir. Belə ki, Almaniyanın da fəal iştirak etdiyi “Tvinninq” layihəsinin icrası nəticəsində ölkəmizdə 3 adda dövlət etalonu laboratoriyası qurulub. Bu işdə Almaniya Metrologiya İnstitutu (PTB) ilə əməkdaşlığı xüsusilə vurğulayan sədr hazırda icrasına başlanan Avropa Birliyinin yeni “Tvinninq” layihəsində də PTB-nin iştirak etdiyini, qurumun ölkəmizin dövlət etalonlarının beynəlxalq səviyyədə tanınmasına dəstək verdiyini qeyd edib. Bundan başqa, Almaniyanın Akkreditasiya Qurumu (DakkS) ilə qarşılıqlı əməkdaşlığın Azərbaycan sənayesi üçün faydalı olduğunu deyən Ramiz Həsənov əlavə edib ki, komitənin sınaq laboratoriyasının DakkS  tərəfindən akkreditasiya olunması ilə yerli məhsulların Avropa bazarlarına çıxışı imkanları genişlənib. Hazırda ölkəmizin texniki tənzimləmə, standartlaşdırma və sənaye mülkiyyəti obyektlərinin mühafizəsi sahələrində Almaniya Standartlaşdırma İnstitutu (DİN) və patent sahəsi üzrə milli orqanla daha sıx əməkdaşlıqda maraqlı olduğunu qeyd edən komitə sədri Azərbaycana göstərdikləri diqqətə görə səfirə minnətdarlıq edib.

    Almaniya Federativ Respublikasının Azərbaycandakı səfiri Mixael Kindsqrab da öz növbəsində səmimi qəbul üçün minnətdarlığını bildirərək, Azərbaycanda sənayenin inkişafı, qeyri-neft sektorunun sənayedə payının artırılması istiqamətində atılan dövlət tədbirlərini yüksək qiymətləndirib. Azərbaycanda keyfiyyət infrastrukturu sahələri olan texniki tənzimləmə, standartlaşdırma, metrologiya, uyğunluğun qiymətləndirilməsi, akkreditasiya və patent sahələrinə verilən diqqətin iqtisadiyyatın şaxələndirilməsində, yerli sənayenin inkişafındakı əhəmiyyətini xüsusi vurğulayıb.

     

     

  • 02 Sentyabr 2016
    Satışda olan mənşəyi məlum olmayan məktəbli formalarının laborator sınaq nəticələri məlum olub

    Standartlaşdırma, Metrologiya və Patent üzrə Dövlət Komitəsi yanında Texniki Tənzimləmə və Standartlaşdırma üzrə Dövlət Nəzarəti Xidməti tərəfindən məktəb yaşlı uşaqlar üçün tikilən üst geyimlərinin – məktəbli formalarının standartların tələblərinə uyğun olmadığı, əmtəə nişanının saxtalaşdırılaraq istifadəsi barədə şikayət araşdırılıb. Müəyyən olunub ki, “Binə”, “Sədərək” ticarət mərkəzlərində, Əhmədli qəsəbəsində yerləşən  ticarət mərkəzində, 8-ci km. qəsəbəsində yerləşən bazar, həmçinin Şəki, Oğuz, Göyçay şəhərlərinin geyim satış məntəqələrində mənşəyi bilinməyən, başqasına məxsus əmtəə nişanını özününküləşdirərək, keyfiyyətsiz məktəbli geyimləri satılır.

    “Binə” və “Sədərək” ticarət mərkəzlərindəki satış məntəqələrindən götürülmüş nümunələr Təcrübə-Sınaq Mərkəzinin (AzTEST) Yüngül sənaye məhsullarının sınağı laboratoriyasına təqdim olunub. Laborator müayinələrin nəticəsində müəyyən olunub ki, məktəbli formaların üzlük və içlik parçaları mövcud normativ sənədlərin tələblərinə uyğun deyil. Belə ki, normativ sənədlərə əsasən içlik parçanın tərkibində kimyəvi liflərin (sintetikanın) miqdarının 50%-dən və üzlük parçanın tərkibində  kimyəvi liflərin (sintetikanın) miqdarının 67%-dən çox olmaması nəzərdə tutulmasına baxmayaraq, sınaqların nəticələrinə görə  kimyəvi liflərin (sintetikanın) miqdarı müvafiq olaraq 98,9%  və 93,7% olub.

    Satışdakı mənşəyi bilinməyən bütün məhsulların üzərində “Bakı Tikiş Evi” ASC-yə məxsus “BTE” əmtəə nişanından qeyri-qanuni istifadə olunduğu aşkar olunub.

    Hazırda araşdırmanın nəticələri əsasında qanunvericiliyə uyğun tədbirlər görülür.

    Məlumat üçün bildirək ki, qanunvericiliyə əsasən məktəbli formaları Azərbaycan  Respublikasında qüvvədə olan dövlətlərarası standart  (ГОСТ 25294-2003 “Məktəb yaşlı oğlan və qızlar üçün üst geyimləri” standartı) əsasında müəssisələr tərəfindən hazırlanmış və dövlət qeydiyyatına alınmış texniki şərtlərin tələblərinə uyğun istehsal edilir.

     

     

     

  • 22 İyul 2016
    Standartlaşdırma, Metrologiya və Patent üzrə Dövlət Komitəsində Milli Mətbuat Günü münasibətilə tədbir keçirilmişdir

    22 iyul 2016-cı il tarixində Standartlaşdırma, Metrologiya və Patent üzrə Dövlət Komitəsində milli mətbuatın yaranmasının 141 illiyi münasibətilə tədbir keçirilib. Tədbirdə çıxış edən Komitə sədri Ramiz Həsənov demokratik inkişafın başlıca amillərindən sayılan azad mətbuatın formalaşmasının, inkişafının Azərbaycan dövlətinin siyasətinin tərkib hissəsi olduğunu deyib. O bildirib ki, vətəndaş cəmiyyəti quruculuğunda nailiyyətlər qazanmış ölkəmizdə medianın sərbəst və dövlət hakimiyyətindən asılı olmayan fəaliyyətinin təmin edilməsi istiqamətində xeyli işlər görülmüş və görülməkdədir: “Azad medianın yaranması və inkişafı ulu öndər Heydər Əliyevin tarixi xidmətidir. 1995-ci ildə qəbul olunan Konstitusiyaya uyğun olaraq, vətəndaşların qanuni yolla informasiya toplamaq, almaq, hazırlamaq, ötürmək və yaymaq hüququ dövlət təminatına əsaslandı. Hazırda Möhtərəm Prezident İlham Əliyevin fikir plüralizminə, söz və mətbuat azadlığına, onun davamlı inkişafına göstərdiyi xüsusi diqqəti hər birimiz görürük. Dövlət başçısının mediaya diqqət və qayğısının nəticəsidir ki, indi ölkəmizdə yüzlərlə mətbuat orqanı, informasiya agentliyi, teleradio şirkətləri, sürətlə inkişaf edən internet portalları fəaliyyət göstərir. Cənab İlham Əliyevin rəhbərliyi altında dövlət tərəfindən media vasitələrinin iqtisadi cəhətdən özünü təmin etməsinə hesablanmış çox vacib addımlar atılıb. Prezidentin Sərəncamları ilə qəzet redaksiyalarına, informasiya agentliklərinə birdəfəlik yardım göstərilib, qəzetlərin "Azərbaycan" nəşriyyatına olan dondurulmuş borcu dövlət büdcəsi hesabına ödənilib. Ölkə  başçısının təşəbbüsü ilə "Azərbaycan Respublikasında kütləvi informasiya vasitələrinin inkişafına dövlət dəstəyi Konsepsiyası" hazırlanaraq təsdiq edilib, Kütləvi İnformasiya Vasitələrinin İnkişafına Dövlət Dəstəyi Fondu yaradılıb. Həmçinin media nümayəndələrinin sosial təminatının gücləndirilməsi, onların mənzil-məişət şəraitinin yaxşılaşdırılması məqsədilə Prezidentin Ehtiyat Fondundan ayrılmış vəsait hesabına yaşayış evləri tikilmişdir. Ölkə başçısı bu gün də medianın inkişafına, bu sahədə çalışanların sosial və digər zəminli problemlərinin tez və səmərəli həllinə xüsusi diqqət göstərir, buna böyük həssaslıqla yanaşır. Təbii ki, dövlət qurumları ilə medianın sıx əməkdaşlığı vacib əhəmiyyət daşıyan məsələdir. Standartlaşdırma, Metrologiya və Patent üzrə Dövlət Komitəsinin fəaliyyətini uğurla, operativ və peşəkarlıqla işıqlandıran jurnalistlərə təşəkkürümüzü bildiririk”.

    Sonda bir qrup media işçisinə Komitə sədri Ramiz Həsənov tərəfindən təltif edilmiş Fəxri Fərmanlar verilib.

bütün xəbərlər
Müasir sənaye